كيف تتفاوض مع المورد الصيني وتحصل على أفضل سعر بدون ما تخسر الجودة ؟

في الصين التفاوض مش معناه إنك تقول عايز أرخص سعر وخلاص ،  لأن أول حاجة لازم تفهمها إن السعر دايما مرتبط بالجودة والخامة والمواصفات وكمية الطلب
أكبر غلط بيقع فيه المستورد إنه يبدأ الكلام بجملة عايز أقل سعر ،  عندك المورد الذكي أول ما يسمع الجملة دي يعرف إنك مشتري سعر مش مشتري جودة ، 
ووقتها يبدأ يقلل في الخامة أو السماكة أو المواصفات عشان يوصل لك للسعر اللي انت عايزه. 

أول خطوة صح في التفاوض إنك تكون محدد المواصفات بدقة قبل ما تتكلم في السعر ،  كل ما كانت مواصفاتك واضحة
كل ما المورد يحترمك ويتعامل معاك بجدية

ثاني خطوة اسأل عن هيكل السعر ، مش عن السعر بس ، يعني اسأله السعر مبني على إيه ؟  خامة إيه ؟ سماكة كام ؟ نسبة زنك كام؟
وزن كام كرتونة كام ؟ 
لما المورد يحس إنك فاهم في التفاصيل بيبطل يحاول يلعب في المواصفات

ثالث خطوة مهمة جدا لا تضغط في أول عرض سيبه يديك سعره الأول وبعدين ابدأ تفاوض بهدوء، 
اسأله هل في خصم على كمية أكبر ؟  هل في تحسين لو الدفع نقدي ؟  هل في تخفيض لو الاتفاق طويل المدى؟ ، 
المورد الصيني يحب العلاقة طويلة المدى أكتر من صفقة واحدة

رابع نقطة لا تقارن مورد بمورد بطريقة مباشرة ما تقولوش فلان اداني أرخص منك بسعر كذا ، 
لأن ده بيخلق توتر الأفضل تقول أنا عندي عروض قريبة من السعر ده  ، هل تقدر تقرب لي في السعر عشان نبدأ شغل طويل مع بعض ؟؟

خامس نقطة لو السعر نزل بشكل سريع جدا من أول مرة خلي بالك غالبا في حاجة اتغيرت في الجودة أو المواصفات ، 
مفيش مصنع حقيقي ينزل عشرة أو خمسة عشر في المئة بسهولة إلا لو كان السعر الأول مبالغ فيه.

وأخيرا أهم سر في التفاوض في الصين هو إنك تخلي المورد يحس إن في مستقبل بينكم مش مجرد حاوية وتمشي ، 
لما المورد يثق إنك عميل مستمر هيديك أفضل سعر بنفسه ،  لأن استقرار الطلب أهم عنده من ربح سريع مرة واحدة
التفاوض الناجح مش إنك تكسب في السعر وتخسر في الجودة
التفاوض الناجح إنك توصل لسعر عادل وجودة ثابتة وعلاقة مستمرة
لو فهمت المعادلة دي هتوفر فلوسك وتحافظ على سمعتك في السوق في نفس الوقت