واحد من أكتر الأسئلة اللي بتتسأل لي من 2007 لحد دلوقتي:
“أسافر الصين ولا أخلص شغلي أونلاين؟”
الإجابة بكل بساطة هي
مش كل صفقة تستاهل تذكرة طيران… ومش كل شحنة ينفع تخلصها من وراء شاشة.
خلينا نتكلم بصراحة وبدون مثالية.

أولًا: إمتى يكفي التعامل أونلاين؟
لو أنت لسه بتجرب منتج بكميات صغيرة، ما فيش أي سبب يخليك تصرف على تذكرة وفندق وتأشيرة.
ابدأ صغير. جرب. اختبر السوق. بعدين كبر الشغل وفكر في السفر . وطبعا لازم تاخد معايير الامان التجاري عند التعامل

يمكنك الاطلاع علي معايير الامان من هنا
ولو  المورد مصنع معروف ومُوثق وعنده سجل تصدير واضح وصور حقيقية وفيديوهات مباشرة، ومعاك جهة موثوقة في الصين تتابع لك، تقدر تخلص شغلك وأنت في بلدك.
لو المنتج بسيط ومواصفاته واضحة جدًا — زي إكسسوارات، أدوات بسيطة، منتجات استهلاكية عادية — نسبة المفاجآت بتكون قليلة.
ولو هامش الربح أصلاً مش كبير، السفر ممكن ياكل مكسبك بالكامل. ساعتها أنت مش بتستثمر… أنت بتغامر.
النهارده الموضوع أسهل بكتير من زمان.
مكالمات فيديو مباشرة من داخل المصنع، فحص قبل الشحن، صور تفصيلية، تقارير جودة، حتى بث مباشر من خط الإنتاج. التكنولوجيا اختصرت المسافات.

طيب… إمتى لازم تسافر بنفسك؟
لو أول مرة تستورد في حياتك، أنا دايمًا أنصح إنك تيجي مرة على الأقل.
مش عشان الصفقة بس… عشان تفهم اللعبة.
لما تمشي في السوق وتشوف 20 مورد لنفس المنتج قدامك، هتفهم فرق السعر.
لما تقعد مع صاحب المصنع وتشرب معاه شاي، العلاقة بتتغير.
لما تدخل المخزن بعينك وتشوف البضاعة قبل ما تتحط في الكرتونة، الإحساس مختلف.
لو المنتج معقد أو سعره عالي أو فيه تفاصيل فنية كتير، السفر بيقلل المخاطرة جدًا.
ولو حجم الصفقة كبير والمبلغ المعرض للخطر كبير، ساعتها الطيارة مش تكلفة… دي تأمين.
المعارض كمان قصة تانية.
في 3 أيام معرض ممكن تقابل موردين أكتر من اللي هتقابلهم أونلاين في سنة كاملة.
المعادلة البسيطة
احسبها كده:
تكلفة السفر ÷ قيمة الصفقة = نسبة المخاطرة.
لو تكلفة السفر 2000 دولار
والصفقة بـ 100 ألف دولار
يبقى أنت بتدفع 2% عشان تقلل مخاطرة كبيرة.
دي صفقة ممتازة.
لكن لو الصفقة بـ 8000 دولار
هتدفع ربع مكسبك في الطيارة.
هنا اشتغل أونلاين انسب ليك

يعني باختصار السؤال مش “أسافر ولا لأ؟”
السؤال: حجم المخاطرة يستاهل الطيارة والفندق وووووو؟
في ناس بتسافر بدري قوي قبل ما تكون جاهزة.
وفي ناس بتخاف تسافر فتفضل في منطقة الأمان وتفضل صغيرة.
الذكي هو اللي يعرف إمتى يستخدم الطيارة… وإمتى يستخدم الواي فاي.
لو أنت ناوي تبدأ أول شحنة أو محتار تيجي الصين ولا تشتغل أونلاين، اكتب لي نوع المنتج وحجم الميزانية ونشوف القرار الصح لحالتك ...